一萬兩千公尺懸 ê 南天景色 ft. Ông Huē-Bûn (20210130)

一萬兩千公尺懸 ê 南天景色 <br />https://apod.tw/daily/20210130/ <br /> <br />這張富麗 ê 夜空影像是南天 ê 天文景色，是 tī 厚雲 ê 地球頂懸翕 ê。這个景色是 ùi 航空公司 ê 飛行甲板 tī 1 萬 2 千公尺懸 ê 所在，穩定向西飛去秘魯 ê 利馬 ê 時陣翕 ê。為著欲翕著清楚 ê 航空天文相片，to̍h 愛連紲翕足濟張短時間感光 ê 相片，才 kā 內底上好 ê 幾若張揀出來，疊做一張。闊莽莽 ê 南天銀河 ùi 倒爿頂懸 ū 烏炭橐仔星雲 kah 南十字 ê 所在，一直湠到正爿 ū 龍骨座星雲 kah Gum 星雲 ê 所在。老人星是龍骨座 ê alpha 星，嘛是地球看會著 ê 第二光 ê 星。伊 to̍h tī 銀河下跤，足好揣 ê。Kah 銀河 ê 矮星系，大麥哲倫星雲，仝款好揣。小麥哲倫星雲 to̍h tī 厚雲 ê 地平線面頂。當然，南天極嘛 tī 這張閃閃爍爍 ê 南天影像內底。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />影像：Ralf Rohner <br />音樂：PiSCO - 鼎鼎 <br />聲優：Ông Huē-Bûn <br />錄音：玉成戲院錄音室 <br />翻譯：An-Li Tsai (NCU) <br />原文：https://apod.nasa.gov/apod/ap210130.html <br /> <br /> <br/>Powered by <a href="https://firstory.me">Firstory Hosting</a>