#180 NGC 7814：有超新星 ê 細頂草帽仔星系 ft. 蔡老師 (20210722)

<p>NGC 7814：有超新星 ê 細頂草帽仔星系 <br />https://apod.tw/daily/20210722/ <br /> <br />Kā 你 ê 望遠鏡 tùi 飛足懸 ê 飛馬座 看，你會當看著咱這个 寬闊銀河系 ê 恆星 kah 遙遠 ê 星系。NGC 7814 to̍h tī <br />這幅美麗視場 ê 中央，伊 ê 視角 差不多 kah 月娘 平闊。NGC 7814 有當時仔嘛叫做細頂草帽仔星系，因為伊 kah 另外一个較有名 ê <br />M104，草帽仔星系 足成 ê。草帽仔星系 kah 細頂草帽仔星系攏是側向 ê 捲螺仔星系。In 攏有寬闊 ê 銀暈 kah 銀核，毋閣 in ê 外形攏去予 <br />in ê 薄星系盤 kah 足狹 ê 塗粉帶分做兩爿。實際上，NGC 7814 離咱 4000 萬光年遠，伊差不多有 6 萬光年闊。這个 細頂草帽仔星系，kah <br />彼个較有名 ê 草帽仔星系差不多平大。伊看起來較細較暗，只是因為伊較遠爾爾。這个 tī 7 月 17 翕著 ê 望遠鏡影像，有一个新發現 ê 超新星，to̍h <br />tī 銀核 ê 倒爿。伊 去予編做 SN 2021rhu，是 Ia 型 ê 超新星，會使用來校正 宇宙 距離 ê 大細。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />影像：CHART32 Team <br />音樂：PiSCO - 鼎鼎 <br />聲優：蔡老師 <br />翻譯：An-Li Tsai (NCU) <br />原文：https://apod.nasa.gov/apod/ap210722.html <br /> <br/>Powered by <a href="https://firstory.me">Firstory Hosting</a></p>