794. Medusa 星雲 ft. 阿錕 (20230317)

<p>這个看起來有編織花樣 kah 蛇紋 ê 發光氣體雲絲，予伊得著這个足紅 ê 名：Medusa 星雲。伊嘛予人號做 Abell 21。這个 Medusa 星雲是一个足老 ê 行星形星雲。伊 to̍h tī 雙生仔座方向，離咱有 1500 光年遠。Kah 神話 內底 ê 名仝款，這个星雲嘛有一个戲劇性 ê 轉變。伊現此時 ê 行星形星雲，其實是像太陽這款低質量恆星 演化 到上尾 ê 階段，已經 ùi 紅巨星 轉變做燒滾滾 ê 白矮星矣。Tī 這个過程中，白矮星會 kā 伊 ê 外層氣體幌掉。高溫恆星發出 ê 紫外光 輻射，會 kā 星雲照予光。Tī 發光 ê 月眉形氣體中央彼粒無蓋光 ê 天體，to̍h 是 Medusa 星雲演化尾期 ê 恆星。Tī 這張深空 ê 望遠鏡景色 內底，較暗 ê 雲絲嘛翕甲真清楚。這寡雲絲 to̍h 湠到較光彼个月眉形氣體 ê 正爿 kah 下底去。照估計，Medusa 星雲應該有超過 4 光年大。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230317/ <br />影像：Martin Bradley Chesterfield Astronomical Society <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230317.html <br /></p> <br /> <br/>Powered by <a href="https://firstory.me">Firstory Hosting</a>