716. 少年星團 NGC 346 ft. 阿錕 (20230113)

<p>質量上大 ê 少年星團是 NGC 346。伊就 tī 咱 ê 衛星星系 小麥哲倫星雲 ê 恆星形成區內底，離咱有 21 萬光年遠。雖罔講 NGC 346 星團內底 ê 大質量恆星 攏足短命--ê，毋過 in 攏 活跳跳 閣 pìn-piàng 叫。恆星風 kah 輻射 leh 雕這區 厚塗粉 分子雲外沿 ê 時陣，會驅動內底 ê 恆星形成活動。恆星形成區內底會有足濟 紅嬰仔恆星，四散 tī 星團內底。In 才 300 到 500 萬歲爾爾，猶未開始 tī in ê 核心 進行 水素 ê 核融合反應。NGC 346 這張壯觀 ê 紅外線景色 是 ùi James Webb 太空望遠鏡 ê 近紅外線相機&nbsp;NIRcam 翕--ê。相片內底 ê 粉紅仔色，是大質量恆星 ê 高能輻射 kā 水素原子 離子化。柑仔色是恆星形成分子雲 內底 ê 水素分子 kah 塗粉 發出 ê 發射線。Webb 太空望遠鏡翕--ê 這張 遮爾清楚 ê 少年恆星形成區，若是照 小麥哲倫星雲 ê 距離來估算，應該是有 240 光年闊。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230113/ <br />影像來源：科學：NASA, ESA, CSA, Olivia C. Jones (UK ATC), Guido De Marchi (ESTEC), Margaret Meixner (USRA)； 資料： Alyssa Pagan (STScI), Nolan Habel (USRA), Laura Lenkić (USRA), Laurie E. U. Chu (NASA Ames) <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230113.html</p> <br /> <br/>Powered by <a href="https://firstory.me">Firstory Hosting</a>