715. 英仙座內底 ê 星塗 ft. 阿錕 (20230112)

<p>這片宇宙雲 內底有塗粉、氣體、kah 恆星，伊 tī 天頂佔差不多 6 度闊，就 tī 英雄星座 英仙座 ê 方向遐。Tī 這个 壯麗天景 ê 倒爿頂懸，有一个迷人 ê 少年星團 IC 348。伊 ê 邊仔是 飛行幽靈星雲，內底有閘光 ê 星際塗粉雲，tī 目錄內底 ê 編號是 Barnard 3 kah Barnard 4。正爿有另外一个活跳 ê 恆星形成區 NGC 1333，伊就 tī 大型 英仙座分子雲 外圍 較烏 ê 塗粉鬚 邊仔，kah 咱 ê 距離差不多有 850 光年遠。視野中央較暗 ê 紅光是 ùi 水素氣體 發出來--ê，週邊是厚塗粉 ê 星雲去予散射 ê 結果。實際上，宇宙塗粉 會 kā 新形成 ê 恆星 kah 一寡初期恆星體 (YSO) 抑是 原恆星 藏起來，予光學望遠鏡揣無。原恆星 是 ùi 分子雲內底 密度較懸 ê 雲核生出來--ê，紲落來才靠 自搝引力 ê 崩塌，形成新 ê 恆星。咱若是照這个分子雲 ê 距離來 估計，這个視野差不多有 9 光年闊。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230112/ <br />影像：Jack Groves <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230112.html</p> <br /> <br/>Powered by <a href="https://firstory.me">Firstory Hosting</a>