686. 獵戶座太空船 kah 月球 ê 風暴洋 ft. 阿錕 (20221208)

<p>無載人 ê 獵戶座太空船頂懸彼台 kha-mé-lah，佇 12 月 5 號翕著這个景色。這个時陣獵戶座太空船當咧倚近月球，時到會利用飛過月球提著動力，才飛轉來地球。佇獵戶座太空船其中一片太陽能枋下底，是風暴洋 西爿 邊緣 暗暗平平 ê 地形。風暴洋 是 過去月球頂懸上大 ê 岩漿海，伊佇月球倚咱地球這爿面是足明顯--ê。月球 ê 晨昏線就佇相片 ê 倒爿，這是月球日時佮暗暝交界 ê 烏影線。相片頂懸中央彼个是直徑 41 公里闊 ê 深色 Marius 隕石坑。相片正爿邊仔彼个有輻射紋 ê Kepler 隕石坑，就佇太陽能枋 ê 正爿。Kepler 隕石坑 ê 淺色輻射紋，湠到北爿 kah 西爿，去拄著 深色 ê Marius 隕石坑。是講，獵戶座太空船按算欲佇 12 月 11 彼工轉來，伊會降落佇地球 ê 太平洋。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20221208/ <br />影像：NASA, Artemis 1 <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap221208.html</p> <br /> <br/>Powered by <a href="https://firstory.me">Firstory Hosting</a>