350. Leonard 彗星 ê 長尾溜 ft. 阿錕 (20211230)

<p>Leonard 彗星 是 2021 年上光 ê 彗星。這兩張相片是 tī 智利 Atacama 沙漠 ê 天頂翕 ê，彗星 to̍h tī 這兩張相片 ê 倒爿下跤遐。一月 3 號是 Leonard 彗星 ê 近日點，伊這馬當 leh 飛過去，彗尾嘛愈來愈長，愈來愈看會著。這是 kā 闊幅鏡頭翕 ê 幾若張相片疊做一張 ê（用烏白相片是欲予這个對比閣較明顯）。按呢翕，是為著欲追蹤複雜 ê 離子尾溜。是講，這个尾溜迒過天頂 60 度闊，實在是有夠長 ê 啦！木星嘛足光 ê，tī 正爿下跤 ê 地平線附近爍咧爍咧。這款物質是 ùi Leonard 彗星 ê 核心 蒸發出來 ê。這差不多有 1 公里闊，內底有足濟沙塗、岩石、kah 冰。這寡物件去予太陽光照甲面頂 ê 離子氣體 leh 發光，產生長長 ê 尾溜。最近幾若禮拜 彗核 受著太陽風 kah 磁場 ê 影響，有當時仔會突然間爍一下。這嘛造成彗尾產生無規則、彎彎曲曲 ê 尾溜。Leonard 彗星到近日點猶閣有幾若工，伊會繼續 遮爾活跳跳。彗星這馬 tī 太陽系黃道面 ê 南爿，掃過南天 ê 顯微鏡座。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20211230/ <br />影像：Daniele Gasparri <br />音樂：高小糕 GaoXiaoGao <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap211230.html <br /> <br/>Powered by <a href="https://firstory.me">Firstory Hosting</a></p>