557. 天欲光彼陣 ê Tycho 隕石坑 kah Clavius 隕石坑 ft. 阿錕 (20220716)

<p>這張望遠鏡景色 ê 頂懸是南方，有翕著 月娘晨昏線 kah 月球南方坎坎坷坷 ê 高地。這張月景是 7 月 7 號翕 ê，拄仔好拄著 頂半月 ê 月相。太陽光 ùi 正爿較低角度 ê 方向照過來。Tī 這區 較少年 ê Tycho 隕石坑 kah 較老 ê Clavius 隕石坑 ê 天色嘛欲光矣。Tī 中央倚倒爿下跤，有較懸 坑仔墘--ê，是較少年 ê Tycho 隕石坑。伊差不多才 1 億歲爾爾，直徑有 85 公里闊。中央 ê 山尖有 2 公里懸，這个隕石坑 ê 坑仔墘，反射較光 ê 太陽光。另外較暗 ê 烏影區，是較平 ê 地表。這个 ùi 隕石挵著產生 ê Tycho 隕石坑 噴出來 ê 石屑仔，會 tī 月圓前後，變做一个 足出眾 ê 隕石坑。In tī 月球倚地球這面，產生足清楚 ê 放射形光巡。這个光巡系統差不多有規爿月娘遐爾大。實際上，阿波羅 17 號 ê 登陸地點，離 Tycho 隕石坑 差不多才 2000 公里遠。Tī 遮有揣著一寡物質，可能是 ùi Tycho 隕石坑噴出來 ê 物件。Tī 月球倚地球這爿，有一个上老上大 ê 隕石坑，叫做 Clavius 隕石坑。伊 ê 直徑有 225 公里闊，就 tī Tycho 隕石坑 ê 南方（這張相片 ê 頂懸）。Clavius 隕石坑 上早以前去予隕石挵出來 ê 放射形系統，嘛 tī 足久以前就 ui--去矣。較老隕石坑 ê 坑仔墘較無完整，本底較平 ê 地表，tī Clavius 隕石坑形成了後，嘛因為有新 ê 隕石落落來，這馬已經去予較新較細 ê 隕石坑疊 tī 頂懸矣。這个 tī 烏影區 較老 ê Clavius 隕石坑內底，較少年隕石坑 ê 坑仔墘，反射月球面頂透早 ê 貓霧光，產生幾若條狹狹 ê 光弧。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220716/ <br />影像：Eduardo Schaberger Poupeau <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220716.html</p> <br /> <br/>Powered by <a href="https://firstory.me">Firstory Hosting</a>