1004. IC 2118：尪姨頭星雲 ft. 阿錕 (20231004)

<p>這个星雲看起來敢有成尪姨 ê 頭？逐家 kā 這个星雲叫做尪姨頭星雲，就是因為伊 ê 形體就敢若是 萬聖節風格 bàng-kà 內底 ê 尪姨 ê 頭。是講這个形體到底是按怎來--ê？這就是一个愛靠想像力來臆 ê 主題矣。咱知影 ê 部份是 IC 2118 大細差不多 50 光年 大，是氣體 kah 塗粉組成--ê。所以咱會使臆講，這个形體因為有一部份去予附近 ê 參宿七 侵蝕去矣。參宿七 是 獵戶座 內底較光 ê 一粒恆星，就 tī 這張影像 下底閣出去 ê 所在。尪姨頭星雲 ê 藍光毋但是因為 參宿七 有足強 ê 藍光，嘛是因為 塗粉粒 散射 藍光 ê 效率比紅光較好。仝款這个 物理機制，造成地球日時 ê 天空是藍色--ê。毋過 tī 地球大氣 內底 ê 散射源，是 窒素 分子 kah 酸素 分子。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20231004/ <br />影像：Abdullah Alharbi <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NSYSU) <br />原文：https://apod.nasa.gov/apod/ap231004.html</p> <br /> <br/>Powered by <a href="https://firstory.me">Firstory Hosting</a>